Templates by BIGtheme NET

Author Archives: Marwaan

Shir looga soo horjeedo Madaxweynaha Jubbaland oo lagu qabtay Degmada Doolow

Doolow–KNN– Degmada Doolow ee Gobolka Gedo Maanta waxaa ka dhacay Shir looga soo horjeedo Madaxweynaha Maamul Gobolleedka Jubbaland Axmed Maxamed Islaam Axmed Madoobe,waxaana Shirka ka soo qeyb galay Wasiirro,Xildhibaanno ka tirsan Jubbaland iyo Waxgarad ka soo jeeda Gobolka Gedo.

Dhinacyada ka qeyb galay Shirka Maanta ka dhacay Magaalada Doolow ee Gobolka Gedo ayaa sheegay in tan iyo markii la dhisay Maamulka Jubbaland ay dhibaato ka dhacleen,waxaana ay sheegeen in Dadka daga Gobolka Gedo ay Dhibaato Joogto ah iyo Xasuuq ay ku qabaan Maamulka Jubbaland oo aysan jirin wax ay ka faa’ideen sida ay hadalka u dhigeen.

Wasiirada iyo Xildhibaanada ka tirsan Jubbaland ee ku shiray Magaalada Doolow ayaa horay u sheegay in Dastuurka Maamulka Jubbaland lagu tuntay islamarkaana uu Gacanta ugu jiro Madaxweynaha Jubbaland Axmed Maxamed Islaam Axmed Madoobe.

Jubbaland weli kama hadlin Eeda uga timid Xildhibaanada iyo Siyaasiinta ku shiray Magaalada Doolow ee Gobolka Gedo

Ciidamo la sheegay in ay Dowladda ka tirsan yihiin oo ku dagaalamay Muqdisho

Muqdisho–KNN– Ciidamo la sheegay in ay ka wada tirsan yihiin Dowladda ayaa Maanta ku Dagaalamay inta u dhaxeysa Ex-Koontorool Afgooye iyo Xaruntii hore ee Ciidamada Asluubta ee Magaalada Muqdisho.

Dagaalka ayaa la sheegay inuu Salka ku hayay Dhul ku yaalla Aagaas oo Dhinacyada Dagaalamay ay isku qabsadeen.

Illaa 2 Qof oo Shacab ah ayaa la Xaqiijiyay in ay ku dhaawacmeen Dagaalka maanta ka dhacay inta u dhexeysa Asluubta iyo Ex.koontorool.

Dhowr Jeer ayaa Ciidamada Dowladdu ay iskula dhaceen gudaha Magaalada,waxaana isku dhacyada dhexmara Ciidamada Dowladda ka dhashay Khasaaro kala duwan.

Ra’iisulwasaare ku xigeenka Australia oo xilka laga xayuubiyay

Ra’iisulwasaare ku xigeenka Australia, Barnaby Joyce iyo afar siyaasi oo kale ayaa si khalad ah loo doortay maadaama oo ay haysteen labo dhalasho, sida ay go’aamisay maxkamadda sare.

Go’aanka maxkamadda sare ee Australia ayaa ka dhigan in saddex siyaasi oo uu ku jiro Joyce xilalkii ay hayeen uu khaldanaa. Kuwa kale bishii Luulyo ayay is casileen.

Shaqo ka tagitaanka Joyce ayaa liicliicinaysa dawladda aqlabiyadda halka kursi ah haysatay, waxaase laga yaabaa in uu ku soo laabto doorasho ku celis ah.

Ra’iisulwasaare ku xigeenka ayaa ka tanaasulay dhalashadiisa New Zealand bishii Agoosto wuxuuna sheegay in uu dib isugu soo sharixi doono kursigiisa aqalka hoose

“Waan ixtiraamayaa go’aanka maxkamadda” ayuu yiri Joyce sidaadii ay maxkamaddu go’aanka u gaartayba.

Jinsiyadda labada dal ah ayaa haraysay siyaasadda Australia tan iyo bishii July, taas oo horseeday in xildhibaanno badan ay fagaareyaasha ka sheegaan jinsiyadooda.

Tiro yar oo u soo baxday codaynta doorashadii Kenya

Madaxa guddiga doorashada ee Kenya ayaa sheegay in 33% dadka u diiwaan gashan inay codkooda dhiibtaan oo kaliya ay u soo baxeen inay codeeyaan isku celiska ahayd ee doorashadii shalay dhacday.

Tani ayaa ah hoos u dhac weyn, oo 80% in ku dhow ka yar tirada dadkii u soo baxay doorashadii dhacday Agoosto.

Waxay daba socotaa baaqii hogaamiyaha mucaaradka, Raila Odinga, ee ahaa in la qaaddaco doorashada.

4 goobood ayaa dib loo dhigay doorashadii ka dhici lahayd, kuwaasoo ay rabshado ka dheceen.

Laba qof ayaa iyagana la sheegay in ay ku dhinteen rabshado ka dhacay dalka.

Tirinta codadka ayaa iminka socota, lamana filayo in natiijada kama dambaysta ah lagu dhawaaqo wixii ka horreeya 29ka Oktoobar.

Qaadacaad

Wiil dhalinyaro ah ayaa waxaa toogtay booliiska, isagoo goor dambe dhintay, kaddib markii ay isku dhacyo ka dhaceen magaalada uu mucaaradku ku xooggan yahay ee Kisumu, oo ah mid ka mid ah deegaannada afarta ah ee qalalaasuhu uu saameeyay.

Madxaweyne Uhuru Kenyatta ayaa lagu dhawaaqay inuu ku guuleystay doorashadii August, balse mar kale ayaa doorashada lagu celiyay sababo la xiriira inaysan si sax ah u dhicin.

Madxaweyne Kenyatta ayaa doonaya in mar labaad la doorto. Hoggaamiyaha mucaaradka Raila Odinga ayaa ka laabtay musharraxnimadiisii madaxtinnimada.

Gudoomiyaha guddiga doorashada Wafula Chebukati ayaa horay u sii sheegay in xorumaha coddayntu ay furmi doonaan 6:00 subaxnimo, ka dib markii ay xukuumadu damaanad qaad siisay.

Tobannaan kun oo booliis ah iyo xubnaha kale ee laamaha ammaanka ayaa loo daad gureeyay goobaha cod bixinta si ay u sugaan ammaanka goobaha laga codaynayo iyo xarrumaha codka laga dhiibanayo.

Qaar kamida Madaxda Maamul Gobolleedyada oo Maanta la filayo in ay yimaadaan Muqdisho

Muqdisho–KNN– Iyadoo lagu wado Berri oo ku beegan 28-ka Bishaan inuu Magaalada Muqdisho ka furmo Shirka u dhexeeya Madaxda Dowladda Federaalka Soomaaliya iyo kuwa Maamul Gobolleedyada Ee Xubnaha ka ah Dowladda Dhexe ayaa Maanta la filayaa in Magaalada Muqdisho ay soo gaaraan.

Warar ay heshay Idaacadda Kulmiye ayaa sheegaya in Maanta Muqdisho ay imaan doonaan Madaxweyneyaasha Koofur Galbeed iyo Galmudug oo kala ah Shariif Xasan Sheekh Aadan iyo Axmed Ducaale Geelle Xaaf.

Madaxweyneyaasha Puntland,Hirshabelle iyo Jubbaland ayaa sidoo kale la sheegay in Berri ay soo gaari doonaan Magaalada Muqdisho.

Golaha Wasiirada Soomaaliya ayaa shalay sheegay in loo diyaar garoobay Shirka Madaxda Maamul Gobolleedyada ee ka dhici doona Magaalada Muqdisho Ee Caasimadda Dalka.

Madaxweynaha Soomaaliya Maxamed C.llaahi Farmaajo ayaa Casuumaad u fidiyay Madaxda Maamul Gobolleedyada si looga wada hadlo Khilaafka u dhexeeya Dowladda Dhexe iyo Maamul Gobolleedyada.

Taliyaha Hay’adda Nabad Sugidda oo Eedeeyay Mareykanka iyo QM

Taliyaha ciidamada Nabadsugida Qaranka Cabdulaahi Cabdulaahi Maxamed Cali Sanbaloolshe ayaa ku eedeeyay wadamada caalamka inaysan siin aqbaaraadka ay hay’ada nabadsugida uga baahan yihiin iyo qalab ku filan oo ay ku baaraan falalka ay ka mid yihiin qaraxyada ka dhaca gudaha Soomaaliya.

Qoraal dheer oo uu ku daabacay wargeyska caanka ah ee New York Times ayuu Sanbaloolshe ugaga hadlay arrimo faro badan,hase yeeshee qeybaha ugu muhiimsan ayaa waxaa ka mid ahaa isagoo sheegay in macluumaadka lagu helo baaritaanada sida qaraxyada ay wadamada saaxibada la ah Soomaaliya oo uusan magacaabin ay u qaadaan dibada si baaritaano dheer loogu sameeyo balse aysan saraakiisha Soomaalida u qaabilsan baaritanada aan dib dambe loogu soo celin natiijada ka dhalatay baaritaanka dibada lagu soo sameeyay.

“Waxaan ku shaqeynaa indhoolnimo,balse waxaaba noogaga sii daraya kaalmada farsamo ee wadamada caalamka aan ka helno taasoo ujeedadoodu ay tahay in indhaha na sii tiraan oo aan cadowga ula dagaalami weyno.”ayaa ka mid ah ereyadii uu isticmaalay Sanbaloolshe.

Taliyaha ciidamada NISA Cabdlaahi Maxamed Sanbaloolshe ayaa hase ahaatee sheegay in bishii May ee sanadkan in Wasiirka Amniga Ducaale iyo isaga ay isu xilsaareen inay wax ka qabtaan amniga magaalada Muqdisho ayna u suurtogashay in illaa xad ay kontaroolaan hubka iyo waxyaalaha qarxa ee la soo gelinayo caasimada balse ay kaalmo dhinaca farsamada iyo tababarka ahba ay weydiisteen wadamada Maraykanka, Ingiriiska iyo Qaramada Midoobay balse aan loogaga soo jawaabin.

“Waxaan ka codsanay wadamada aan bah-wadaagta nahay in ay nala qeybsadaan akhbaarta iyo cadeymaha laga helo qaraxyada ka dhaca Soomaaliya oo dowlada Soomaaliya ay wax ka ogaato balse taas bedelkeeda dhagaha ayaa nalaga fureystay.”ayaa ka mid ah qoraalkii uu wargeyska New York ku daabacay Sanbaloolshe.

Ugu dambeyntii qoraalkiisa ayuu ku soo daray qaraxii ugu dambeeyay ee ka dhacay Muqdisho 14kii Oktoobar kaasoo dad badan ay ku dhinteen waxana uu ku tilmaamay inuu ahaa dambi laga galay shacabka Soomaaliyeed.

“laakiin ma hayno waddo aan ku xaqiijino cadeymaha la xiriira qaraxaas si aan dadkii ka dambeeyay aan sharciga u horkeeno, qaraxyada noocaas oo kale ah waa suurtogal inay sii socdaan ma aha oo kaliya Soomaaliya gudaheeda balse meel walba oo uu Shabab ka howlgalo.”ayuu yiri Sanbalooshe.

Sanbalooshe ayaa ku taliyay in si loogaga hortago qarax noocaas oo kale oo dhibaato baaxad weyn geysta in ay u baahan yihiin tababaro,qalab wanaagsan iyo awood ay ku sameyaan baaritaano cilmi ku dhisan oo weliba gudaha Soomaaliya lagu sameeyo. Waayo buu yiri baaritaanada dibada loo qaado waxba uma tarayaan ummada Soomaaliyeed oo marwalba la dhibaateynayo.

Xigasho; New York Times

Qaraxii Soobbe ma halkaas ayaa looga hari doonaa?

Muqdisho–KNN–Soomaaliya weli sooma marin in dad ka badan 350 qof ay hal maalin oo kaliya qarax ku dhintaan,Waa dhacdo dhalisay su’aalo iyo doodo dhinacyo badan yeeshay.

50 qof ka badan ayaa weli la la’yahay. Waxaa loo tirinayaa inay dambaska ka mid noqdeen.

Su’aasha aan ilaa hadda jawaabta loo helin waxay tahay nooca qaraxan uu ka samaysnaa ee sidaa dadka u laayay. Ma qaraxyadii gudaha dalka lagu farsamayn jiray baa, mise waa wax nagu cusub oo ka tan weyn?

Shacabku si isku mid ah ayey uga jawaabeen ayadoo aan loo eegin farqiyada siyaasadeed ama kala duwanaanshaha afkaarta. Meydadka la aasay mooyee waxaa jiray in dhaawacyada gurmad xoog leh loo fidiyey.

Dalal ay ka mid yihiin Turkiga, Jabuuti, Qadar, Iimaaraadka, Kenya, Itoobiya, Maraykanka iyo Suudaan ayaa dhaawacyada intoodi darnayd loo qaaday ama soo diray dhakhaatiir iyo gargaar caafimaad.

Waxaa soo baxay dhallinyaro is abaabulay oo gurmadka qayb lixaad leh ka qaatay. Waxaa la oran karaa waxay buuxiyeen kaalintii looga baahnaa kooxaha baaritaanka iyo samatabixinta oo ugu yaraan dal walba uu leeyahay si markii ay masiibo timaado ay ula tacaalaan.

Sida aan kor ku sheegay, qaraxan oo kale weli hore uma soo marin taariikhda Soomaaliya. Dad goobjoogeyaal ah waxay sheegeen in gaariga qarxay uu sameynayey guux la moodo sidii Folkaane qarxi raba, intii uu gaarigu soo cararayey isgoysyada Banaadir iyo Soobbe dhexdooda. Dhismeyaal dhagax ka samaysan, sida Hotel Safari, ayaa gebi ahaanba ilbiriqsiyo gudahood dhulka la sinmay.

Dadka aqoonta u leh waxyaabaha qarxa waxay sheegayaan in ay u badan tahay in la kordhiyey awoodda qaraxa oo ugu yaraan la horumariyey ama lagu daray waxyaabo cusub oo waxyeellada badinaya.

Madaxda dawladda Soomaaliya waxay wacad ku mareen in la soo qaban doono cid alla iyo ciddii ka dambaysay qaraxa oo aan la isaga hari doonin.

Gaarigan qarxay waxay warar aan la xaqiijinin sheegayaan in laga soo raray deegaan ka tirsan gobolka Sh/hoose.

Dhamaanba koontaroolladii uu soo maray waxaa joogay ciidamo kuwa dawladda ah oo uu si fudud kaga soo gudbay. Cabdisalaan Yuusuf Guuleed, marna noqday agaasime ku xigeenka hay’adda nabadsugidda Soomaaliya(NISA) oo iminka ka faallooda arrimaha amniga wuxuu sheegayaa in baabuurkan uu yahay mid la yaqaannay oo jidkaas mari jiray, qof la yaqaannana uu damiintay. Wuxuu kaloo sheegay in ay jiraan duruufo nololeed oo askarta ku xeeran iyo qalabkii qaraxyada lagu ogaan lahaa oo aan oollin baraha koontaroollada.

Ilo ay BBC la xiriirtay oo lagu kalsoonaan karo waxay sheegayaan in gaari kale oo isna ku qarxay xaafadda ceel qalow in yar ka dib markii uu gaariga weyn qarxay uu xiriir la lahaa, looguna tala galay in marka hore uu gaariga yar irridda bartilmaameedka qarax ku furo, si gaariga weyn uu qarax xoog leh uga gaysto.

Sida muuqata Dawladda Soomaaliya waxay samaysay baaritaan, waxayna sheegtay in ay xog hayaan, dadna loo qabtay. Ilaa hadda ma jirto tallaabo intaa dhaafsiisan.

Ma jirto cid haddii la qabtay maxkamad la soo taagay. Mana jirto xog kale oo la soo bandhigay oo ah ugu yaraan in la shaaciyo halka uu bartilmaameedku ahaa.

Cabdisalaam Yuusuf Guuleed wuxuu qabaa in qaraxaasi lagaba hortagi karay. “Anigu waan arkay farriimaha la isu dirayo oo laga digayo in gaari noocaas ah uu soo socdo. Maxaa digniintaas loo qaadan waayey waa su’aal ay tahay inay ka jawaabaan hay’adaha amniga” ayuu yiri Cabdisalaan, wuxuuna intaas raaciyey “waxaa looga hortagi karay khatartan oo kale in baabuur kasta oo noocaas ah ah laga taxadaro, la baaro, la hubiyo, ama la joojiyo”.

Baarayaasha dowladda ma sheegin in la hayay sirdoon ku saabsan weerarkan.

Dhinaca kale, dalka waxaa la galiyey 3 maalmood oo baroordiiq qaran ah.

Dagaalka Al Shabaab

Madaxweyne Maxamed C/laahi Farmaajo wuxuu ka codsaday guddoomiyeyaasha labada aqal ee baarlamaanka inuu la hadlo xildhibaannada, hase yeeshee dib ayaa loo dhigay.

Arrinta micnaha samaysay ayaa ah in Mr Farmaajo, bacdamaa uu doonayey inuu labada aqal ee baarlamaanka u jeediyo in dalka la geliyo xaalad dagaal/degdeg ah ay ku haboon tahay inuu marka hore kala tashado oo uu meel saaro kalsoonida iyo ka raalli ahaanshaha arrintaas dalalka ay Soomaaliya ciidamada ka joogaan oo cududdooda lagu tashto, markaa ka dibna uu baarlamaanka hor yimaado. Haddii uu dhanka kale ka billaabo waxaa malaha laga shakiyey in qorshuhu dhicisoobo.

Xigasho BBC

Al-shabaab oo Dilay Hooyo 8 Carruur ah dhashay

Al-Shabab ayaa haweenay ku dilay magaalada Saakow ee Gobolka Jubbada Dhexe kadib markii ay ku eedeeyeen inay ku kacday fal sino ah. Al-Shabab ayaa ku eedeeyey in haweenaydan ay laba guur gashay.

Warar ay heshay idaacadda Warbaahinta  waxay sheegayaan in haweenaydaas ay ka tagtay nin hore u qabay kadib markii ay taageero ka weyday kadibna ay waalidkeed ka dalbatay in laga furo taasi oo ay sameeyeen.

Warar kale ayaa sheegaya in ninka hore uu ka adkaystay furitaanka balse waalidiinta oo adeegsanaya culimo ay ka fureen,Waxaan si madaxbannaan loo xaqiijin in haweenaydaasi ay laba nin isku mar guursatay. Waxaa kale oo aan la xaqiijin in haweenaydan ay qiratay arrintaasi maadaama maxkamadaha Al-Shabab aysan ahayn kuwa dadweynaha u furan.

Al-Shabab ayaa magaca haweenayda ku sheegay Xabiiba Cali Isxaaq, waxaana la sheegay inay da’deedu tahay 30 sano jir. Xabiiba Cali Isxaaq ayaa noqonaysa qofkii labaad ee sannadkan gudihiisa ay Al-Shabab ku dilaan dhagax.

Bishii May ee sannadkan ayaa degaanka Raama Caddey Al-Shabab waxay sidaasi oo kale dhagax ku dileen nin lagu magacaabo Dhaayow Maxamed Xasan oo lagu eedeeyey inuu sino gaystay taasi oo aan sidaasi oo kale loo xaqiijin si madaxbannaan.

Culimada Soomaalida ayaa dhalleeceeyey dilkan ugu dambeeyey ee ay Al-Shabab gaysatay.

Sheekh Cabdiraxmaan Shariif imaamka masjidka Daarul Hijra ee magaalada Minneapolis ayaa sheegay in eedaha Al-Shabab ee ah inay Maxkamad Sareen uu yahay waxba kama jiraan oo aysan waxba Xukumi karin.

Sheekh Cabdiraxmaan Shariif ayaa intaasi ku daray in Al-Shabab ay yihiin urur aan sharci ahayn sidaasi oo kalena garsoorka ay fuliyaan uu noqonayo mid aan sharci ahayn.

R/wasaare kheyrre oo la kulmay Madaxweyne Ordugan

Mudane Xasan Cali Khayre Ra’iisul Wasaaraha Soomaaliya oo ku sugan Dalka Turkiga ayaa la kulmay madaxweynaha Dalkaasi Rajib  Dayid Ordugan.

Madaxweyne Ordugan iyo Raiisul Wasaare Khayre ayaa ka wada hadlay xoojinta xiriirka ka dhexeeya labada Dalka iyo dowrka Dowladda Turkigu ay ka qaadanayso ladagaalanka argagixisada Shabaab.

Dhanka kale waxaa uu booqday dhaawacyadii la geeyey isbitaalada Dalkaasi,raiisul wasaaraha ayaa u rajeeyey in eebe uu bogsiiyo dadkaasi.

Ra’iisul Wasaare Khayre ayaa inta uu joogo magaalada Ankara, waxuu la kulmi doonaa Jaaliyada ku dhaqan dalkaas, waxuuna booqan doonaa bukaandii la geeyay dalka Turki. Sidoo kalena waxuu Madaxwayne Erdogan, kala hadli doonaa xaaladda ay ku suagan tahay Soomaaliya.

Ra’iisul Wasaraha Soomaaliya ayaa dhigiisa dalka Turki, kala hadlay arrimo ay ka mid yihiin xoojinta amaanka, la dagaalanka Argagixsada, iskaashiga dhaqaalaha iyo xoojinta wada shaqaynta labada dawladood. Waxuuna tilmaamay in madaxda Turki, ay diyaar u yihiin sidii ay uga qayb qaadan lahaayeen la dagaalanka iyo cirib-tirka Argagixisada.

Hay’adda SOSDA oo Muqdisho ku qabatay Tababar ku saabsan Caafimaadka”Sawiro”

Muqdisho–KNN–Maanta oo taariikhdu tahay 25 October 2017, Hay’ada SOSDA oo taageero ka helaysa hay’ada Daryeel Association oo xarunteedu ku taal Magaalada Stockholm ee Dalka Sweden waxay Magaalada Mo

Muqdisho ku qabatay Aqoon Kororsi ku saabsan Xuquuqda Caafimaadka galmada iyo dhaliinka (Sexual Health Reproductive Health Rights SRHR).

Tababarkaanoo ay bixinayeen dhaqaatiir aqoon sare leh, waxaa aad looga hadlay Caafimaadka lamaanayaasha is guursanaya sidii loo hubinlahaa, Uurkaan loo diyaar garoobin sidii la isaga ilaalin lahaa,ilmaha caloosha ku Dhinta sidii loo sooxaaqi lahaa,gudniinka fircooniga iyo dhibaatooyinka uu keeno iyo sida la isaga ilaaliyo cudurada la isuugu gudbiyo galmada IWM.

Waxaa ka soo qayb galay dad gaaraya boqol qof oo ka kala yimid xarumaha Barakacayaasha Muqdisho oo isugu jira haween iyo rag intaba.

Ugu dambayntii ka soo qayb galayaasha waxay sheegeen in ay waxbadan oo noloshooda anfacaya ka faa’idaysteen una mahadceliyinayaan hay’ada SOSDA/Daryeel oo aqoon kororsiga u qabtay.