Dagaalamayaal ka tirsan Al-shabaab ayaa maanta weerar culus waxaa ay ku qaadeen Deegaanka Goof-gaduud Buurey oo qiyaastii 30KM u jira Magaalada Baydhabo ee Xarunta Gobolka Baay.
Weerarka oo ku bilowday qaraxyo ayaa Al-shabaab waxaa ay la beegsadeen Saldhig ay Ciidamada Dowladda Federaalka Soomaaliya iyo kuwa koonfur Galbeed ku leeyihiin Degaanka Goof-gaduud Buurey waxaana halkaasi ka dhacay dagaal toos ah oo u dhexeeya labada dhianac.
Kooxda Al-shabaab ayaa la sheegay in weerarka ku bilowday qaraxa kadib ay u suura gashay in ay gacanta ku dhigeen Saldhiga Ciidamada xoogga ay ku leeyihiin ee Goof-gaduud Buurey islamarkaana ay halkaasi askar badan ku dileen sida ay KNN u sheegeen dadka deegaanka.
Wararka ay KNN ka helayso deegaanka goof-gaduud buurey ayaa sheegaya in taliyihii saldhiga booliska deegaanka Goofgaduud buurey ee gobolka Bay Xasan isaaq Xasan Baka, gudoomiyihii deegaankaasi Isaaq Cali iyo ilaaladoodii ay ku dhinteen qarax miino oo Al-Shabaab ay ugu dhex qariyeen meydadka askartii lagu dilay qaraxii iyo weerarkii ka dhacay deegaankaasi.
Taliska ciidamada Xoogga dalka ayaa waxaa ay ka hadleen qaraxyada iyo weerarka ay Al-Shabaab maanta ku qaadeen deegaanka Goofgaduud buurey ee gobolka Baay.
Taliska ayaa sheegay in howlgal ka dhacay deegaanka Goofguduud buurey ee G/Baay lagu dilay ilaa 10 dagaalame oo ka tirsan Al-Shabaab.
Dhanka kale Warbaahinta ku hadasha Afka Al-shabaab ayaa sheegtay in Dagaalamayaal ka tirsan kooxdooda ay dagaal kula wareegeen deegaanka Goof-gaduud buurey.
Xaaladda deegaanka Goofagaduud buurey ayaa haatan ah mid degan, balse waxaa dhaq-dhaqaaqay iska soo horjeedo laga dareemayaa duleedka magaalada Baydhabo ee gobolka Baay.
