Muqdisho-KNN-Banaanbax looga soo horjeedo weerarkii Al-Shabaab ay ka geystay Ex-kontorool Afgooye ee magaalada Muqdisho ayaa maanta lagu qabto dugsiga tababarka ee booliska Soomaaliya ee Janaraal Kaahiye ee Magaalada Muqdisho.
Dibad baxan oo ay isugu soo baxeen Kumanaan Qof oo ka kala socda 17-ka Degmo ee Gobolka Banaadir ayaa waxaa ka muuqata shucuur ay ku muujinayaan sida ay ugu xun yihiin qaraxii Al-Shabaab dadka shacabka ah ku laaysay isgoyska Ex-kontorool Afgooye ee Magaalada Muqdisho.
Bananbaxayaasha ayaa waxaa ay wataan Boorar ay ku qoran yihiin erayo ay ka mid ah yihiin soo sheeg Al-Shabaab, Ardaydeena waa mustaqbalkeena iyo turkiga waa walaalaheena.
Qaar ka mid ah dadka ka qeyb galay banaanbaxa oo la hadlay KNN ayaa waxaa ay sheegeen in ay ka xun yihiin qaraxii dhawaan ka dhacay Isgoyska Ex-kontorool Afgooye ee Magaalada muqdisho.
Guddoomiyaha gobolka Banaadir ahna duqa Muqdisho oo ka hadlay banaanbaxa ayaa waxaa uu sheegay inuu aad ugu xun yihiin qaraxii Al-Shabaab ay ka geysteen isgoyska Ex-Kontorool Afgooye.