Muqdisho-KNN-Maxkamada ciidamada qalabka sida ayaa maanta waxaa ay xukun ku riday 12 askari oo soo faarujiyay aagga deegaanka Dhanaane ee Gobalka Shabeelaha Hoose.
Askarta ayaa waxaa lagu eedeeyay in ay ka soo baxeen aag dagaal iyo amardiido ay ku samaayeen Abaanduulaha Ciidamada Xoogga Dalka kowdii bishii sideedaad ee sanadkan.
Askartan ayaa ka soo baxay aagga Dhanaane ee gobalka Shabeelaha Hoose halkaasi oo ay ku qornaayeen, waxaana sagaal kamid ah ay wada ahaayeen isku difaac halka sedaxda kale ay iyana ka soo baxeen gooba kale oo ka tirsan aagagga dagaalka ee gobalka Shabeelaha Hoose.
Xeer Ilaalinta Ciidamada Qalabka Sida ayaa ku eedeeyay in askartan ay sameeyeen amar diido, islamarkaana ay ka soo baxeen aag dagaal oo ku yaala deegaanka Dhanaane.
Qareenada u doodayay eedeysanayaasha ayaa ka hor sheegay garsoorka in la siiyo fursad kale oo ay dib ugu noqdaan goobihii ay ka soo baxeen maadama markii hore iyaga ay ahaayeen kuwa qeybta ka ahaa xureeynta goobaha ay ka soo baxeen.
Maxkamadda ayaa ugu dambeyn go’aan ku gaaray in dhammaantood si wada jir ah loogu xukumo min Shan sano oo xabsi Ciidan ah.
Gaashaanle Dhexe Xasan Cabdiraxmaan Aadan Wabiyow ayaa warbaahinta u sheegay in askartan xukun lagu riday, islamarkaana waxaa lagu soo eedeeyay amar diido ay sameeyeen, iyo in ay ka soo baxeen aag dagaal oo ku yaala deegaanka Dhanaane ee Gobalka Shabeelaha Hoose.
Maxkamada ciidanka Qalabka sida ayaa badanaa waxaa xukuno ku ridaa Askarta ka tirsan Dowlada Federaalka Soomaaliya iyo dagaalamayasha ka tirsan Al-Shabaab.
Halkan ka akhriso
