Muqdisho-KNN-Maxkamad ku taalla Magaalada Wajeer ee Gobolka Waqooyi Bari Dalka Kenya, ayaa min 15 Sano oo Xabsi ah ku ridday Saddex Nin oo ku eedeysan in ay xiriir la leeyihiin dagaalamayaadha Al-Shabaab.
Mbarouk Ali Adibu oo 34 jir ah, Idarous Abdirahman oo 32 jir ah iyo Islahi Juma, oo 22 jir ah, ayaa dhammaantood ka soo jeeda Dalka Tansaaniya, waxaana lagu helay agabka ay kooxaha argagixisada u adeegsadaan qaraxyada, sida uu sheegay Garsooraha Maxkamadda, Amos Makoros.
Raggan oo ay laamaha ammaanku qabteen Sanad ka hor , xili ay qorsheynayeen in ay ka tallaabaan xadka kala qeybiya Soomaaliya iyo Kenya, ayaa dib loo dhigay xukunkooda October 19, 2018, markii la waayay xog dhammeystiran oo ku aaddan dembiga lala xiriirinayo.
Maxkamadda Magaalada Wajeer ee Waqooyi bari Kenya , ayaa qabatay in ka badan 50 Kiis oo la xiriira Dacwadaha ka dhanka ah Dadka la tuhmayo in ay Gacan-saar dhow la leeyihiin Al-shabaab.
