Templates by BIGtheme NET

Author Archives: Marwaan

Shirka Madaxda Dowladda Dhexe iyo kuwa Maamul Gobolleedyada oo maanta ka furmaya Muqdisho

Muqdisho–KNN--Shirka u dhexeeya Madaxda Dowladda Federaalka Soomaaliya iyo kuwa Maamul Gobolleedyada ayaa Gelinka dambe ee Maanta ka furmi doona Madaxtooyada Soomaaliya sida ay noo Xaqiijiyeen Mas’uuliyiin ka tirsan Xafiiska Madaxtooyada Soomaaliya.

Shirka ayaa looga hadli doonaa Arrimo dhowr ah oo ay ka mid yihiin Xalinta Khilaafka u dhexeeya Dowladda Dhexe iyo Dowlad Gobolleedyada Xubnaha ka ah Dowladda Federaalka iyo sidii Dowladda Dhexe iyo Maamul Gobolleedyada ay isaga kaashan lahaayeen dagaalka ka dhanka ah Al-shabaab si dalka uu u noqdo Nabad Gelyo loogana saaro Al-shabaab.

Hogaamiyaasha Maamul Gobolleedyada ayaa Gelinka hore ee Maanta imaan doona Muqdisho intooda badan,iyadoo Shalay Magaalada Muqdisho uu yimid Madaxweynaha Koofur Galbeed Soomaaliya Shariif Xasan Sheekh Aadan.

Shirkaan oo horay uu ugu baaqay Madaxweynaha Soomaaliya Maxamed C/llaahi Farmaajo ayaa la sheegay inuu socon doono Mudo ku siman Labo illaa Saddex Cisho,waxaana la aaminsan yahay in Mudada uu socdo Shirka ay Hareyn doonaan Buuq iyo kala Qeybsanaan Madaxda Dhex-dooda ah.

Guddoomiyaha Degmada Cadale oo lagu Dhaawacay Qarax loo dhigay

Garsaale–KNN– Wararka ka imaanaya Gobolka Shabellaha Dhexe ayaa sheegaya in Qarax Miino lala beegsaday Gaari uu watay Guddoomiyaha Degmada Cadale ee Gobolka Shabellaha Dhexe Muuse Maxamed Kadiil xilli uu marayay Degaanka Garsaale.

Guddoomiyaha Degmada Cadale iyo Labo kamida Ilaaladiisa ayaa ku dhaawacmay Qaraxa Miino ee lala beegsaday Xalay,waxaana Dhaawacooda la geeyay Isbitaalka Magaalada Jowhar ee Xarunta Maamulka Hirshabelle.

Guddoomiyaha Degmada Cadale ayaa Xalay ka baxay Degmada Balcad ee isla Gobolka Shabellaha Hoose,waxaana uu ku sii jeeday Magaalada Jowhar,iyadoo Qaraxa loo dhigay Meel u dhow Degaanka Garasaale oo u dhexeeya Degmooyinka Balcad iyo Jowhar ee Gobolka Shabellaha Dhexe.

Wadada Xariirisa Degmooyinka Jowhar iyo Balcad ayaa ah mid ahaankeedu uu Faraha ka baxay,waxaana ku soo laab laabtay Qaraxyada loo dhigo Ciidamada Dowladda iyo Mas’uuliyiinta Maamulka Hirshabeelle.

Mas’uuliyiinta Maamulka Gobolka Shabdellaha Dhexe weli kama hadlin Weerarka lagu dhaawacay Guddoomiyaha Degmada Cadale iyo Qaraxyada ku soo laab laabtay Wadada kala qeybisa Balcad iyo Jowhar.

Madaxweynaha Koofur Galbeed oo Galabta yimid Magaalada Muqdisho

Muqdisho–KNN– Madaxweynaha Maamulka Koofur Galbeed Soomaaliya Shariif Xasan Sheekh Aadan iyo Xubno ka mida Labada Gole ee Maamulka Koofur Galbeed ayaa Galabta ka soo dagay Garoonka Diyaaradaha Magaalada Muqdisho ee Aadan C/lle Cismaan Aadan Cadde.

Shariif Xasan Sheekh Aadan Madaxweynaha Koofur Galbeed ayaa Magaalada Muqdisho u yimid ka qeyb galka Shirka Madaxda Dowladda Federaalka iyo kuwa Maamul Gobolleedyada oo lagu wado in Berri oo Sabti ah uu ka furmo Madaxtooyada Soomaaliya.

Dhanka kale waxaa Berri Gelinka hore imaan doona Magaalada Muqdisho Madaxda Maamul Gobolleedyada kala ah Puntland,Galmudug,Hirsheblle iyo Jubbaland.

Madaxweynaha Soomaaliya Maxamed C/llaahi Farmaajo ayaa Madaxda Maamul Gobolleedyada ku Casuumay Magaalada Muqdisho in ay yimaadaan si looga wada hadlo Khilaafka u dhexeeya Dowladda Dhexe iyo Maamul Gobolleedyada Xubnaha ka ah Dowladda Federaalka.

Wasiirka Amniga Soomaaliya oo la kulmay Dhiggiisa Dalka Turkiga

Kulanka oo ka dhacay xarunta Wasaaradda Arimaha Gudaha Turkiga oo ku taalo magaalada Ankara ayaa Labada Wasiir waxay kaga wada hadleen xaaladda amni ee Soomaaliya iyo sidii loo ciribtiri lahaa Kooxda Argagixisada Al-Shabaab.

Ilo amaan oo soo xiganeysa Wakaalada wararka Turkiga Anadolu ayaa sheegaya in sidoo kale Wasiirka Amniga Xukuumadda Soomaaliya iyo Wasiirka Arimaha Gudaha Turkiga ay kulankooda diirada ku saareen iskaashi laga sameeyo amaanka iyo Heshiis laga gaaray in lagu dhaqaaqo dagaal ka dhan ah Argagixisada Al-Shabaab oo mar waliba caadeystay iney daadiyaan dhiiga shacabka Soomaaliyeed.

Sidoo kale,Labada Wasiir ayaa kulankooda ku soo hadal qaaday sidii tababar loo siin lahaa Ciidamada Booliska Soomaaliya iyo in meel looga soo wada jeesto Ururka Fathula Gulan oo lagu eedeeyay iney ka danbeeyeen Afganibii dhicisoobay ee dhawaan ka dhacay dalkaasi Turkiga.

Wafdi uu hogaaminayo Ra’iisal wasaaraha Soomaaliya Mudane Xasan Cali Kheyre ayaa ku sugan dalka Turkiga halkaasi oo ay kulamo kula leeyihiin mas’uuliyiinta dalkaasi oo ay kala hadlayaan sidii loo taageeri lahaa Dowladda Soomaaliya oo dagaal adag kula jirta Argagixisada Al-Shabaab.

Xaaladda Goobihii lagu Dagaalamay Ee Bariga Gobolka Mudug oo Maanta Degan

Cali-waal–KNN– Wararka ka imaanaya Dhulka Miyiga ah ee Bariga Gobolka Mudug oo Shalay uu ka dhacay Dagaal Qaraar oo u dhexeeya Maamulada Puntland iyo Galmudug ayaa sheegaya in Maanta Xaaladdu ay tahay mid degen oo aysan ka jirin wax dagaal ah.

Dagaalkii Shalay ka dhacay Degaanka Cali-waal ee Waqooyi Bari Gobolka Mudug ayaa la sheegay inuu geystay Khasaaro Dhimasho iyo Dhaawac ah oo soo kala gaaray Dhinacyadii ku dagaalamay Gobolka Mudug.

Dhanka kale waxaa Waan-waan laga dhex bilaabay dhinacyada ku Dagaalamay Waqooyi Bari Gobolka Mudug,waxaana socda Dadaalo lagu heshiisiinayo.

Shir looga soo horjeedo Madaxweynaha Jubbaland oo lagu qabtay Degmada Doolow

Doolow–KNN– Degmada Doolow ee Gobolka Gedo Maanta waxaa ka dhacay Shir looga soo horjeedo Madaxweynaha Maamul Gobolleedka Jubbaland Axmed Maxamed Islaam Axmed Madoobe,waxaana Shirka ka soo qeyb galay Wasiirro,Xildhibaanno ka tirsan Jubbaland iyo Waxgarad ka soo jeeda Gobolka Gedo.

Dhinacyada ka qeyb galay Shirka Maanta ka dhacay Magaalada Doolow ee Gobolka Gedo ayaa sheegay in tan iyo markii la dhisay Maamulka Jubbaland ay dhibaato ka dhacleen,waxaana ay sheegeen in Dadka daga Gobolka Gedo ay Dhibaato Joogto ah iyo Xasuuq ay ku qabaan Maamulka Jubbaland oo aysan jirin wax ay ka faa’ideen sida ay hadalka u dhigeen.

Wasiirada iyo Xildhibaanada ka tirsan Jubbaland ee ku shiray Magaalada Doolow ayaa horay u sheegay in Dastuurka Maamulka Jubbaland lagu tuntay islamarkaana uu Gacanta ugu jiro Madaxweynaha Jubbaland Axmed Maxamed Islaam Axmed Madoobe.

Jubbaland weli kama hadlin Eeda uga timid Xildhibaanada iyo Siyaasiinta ku shiray Magaalada Doolow ee Gobolka Gedo

Ciidamo la sheegay in ay Dowladda ka tirsan yihiin oo ku dagaalamay Muqdisho

Muqdisho–KNN– Ciidamo la sheegay in ay ka wada tirsan yihiin Dowladda ayaa Maanta ku Dagaalamay inta u dhaxeysa Ex-Koontorool Afgooye iyo Xaruntii hore ee Ciidamada Asluubta ee Magaalada Muqdisho.

Dagaalka ayaa la sheegay inuu Salka ku hayay Dhul ku yaalla Aagaas oo Dhinacyada Dagaalamay ay isku qabsadeen.

Illaa 2 Qof oo Shacab ah ayaa la Xaqiijiyay in ay ku dhaawacmeen Dagaalka maanta ka dhacay inta u dhexeysa Asluubta iyo Ex.koontorool.

Dhowr Jeer ayaa Ciidamada Dowladdu ay iskula dhaceen gudaha Magaalada,waxaana isku dhacyada dhexmara Ciidamada Dowladda ka dhashay Khasaaro kala duwan.

Ra’iisulwasaare ku xigeenka Australia oo xilka laga xayuubiyay

Ra’iisulwasaare ku xigeenka Australia, Barnaby Joyce iyo afar siyaasi oo kale ayaa si khalad ah loo doortay maadaama oo ay haysteen labo dhalasho, sida ay go’aamisay maxkamadda sare.

Go’aanka maxkamadda sare ee Australia ayaa ka dhigan in saddex siyaasi oo uu ku jiro Joyce xilalkii ay hayeen uu khaldanaa. Kuwa kale bishii Luulyo ayay is casileen.

Shaqo ka tagitaanka Joyce ayaa liicliicinaysa dawladda aqlabiyadda halka kursi ah haysatay, waxaase laga yaabaa in uu ku soo laabto doorasho ku celis ah.

Ra’iisulwasaare ku xigeenka ayaa ka tanaasulay dhalashadiisa New Zealand bishii Agoosto wuxuuna sheegay in uu dib isugu soo sharixi doono kursigiisa aqalka hoose

“Waan ixtiraamayaa go’aanka maxkamadda” ayuu yiri Joyce sidaadii ay maxkamaddu go’aanka u gaartayba.

Jinsiyadda labada dal ah ayaa haraysay siyaasadda Australia tan iyo bishii July, taas oo horseeday in xildhibaanno badan ay fagaareyaasha ka sheegaan jinsiyadooda.

Tiro yar oo u soo baxday codaynta doorashadii Kenya

Madaxa guddiga doorashada ee Kenya ayaa sheegay in 33% dadka u diiwaan gashan inay codkooda dhiibtaan oo kaliya ay u soo baxeen inay codeeyaan isku celiska ahayd ee doorashadii shalay dhacday.

Tani ayaa ah hoos u dhac weyn, oo 80% in ku dhow ka yar tirada dadkii u soo baxay doorashadii dhacday Agoosto.

Waxay daba socotaa baaqii hogaamiyaha mucaaradka, Raila Odinga, ee ahaa in la qaaddaco doorashada.

4 goobood ayaa dib loo dhigay doorashadii ka dhici lahayd, kuwaasoo ay rabshado ka dheceen.

Laba qof ayaa iyagana la sheegay in ay ku dhinteen rabshado ka dhacay dalka.

Tirinta codadka ayaa iminka socota, lamana filayo in natiijada kama dambaysta ah lagu dhawaaqo wixii ka horreeya 29ka Oktoobar.

Qaadacaad

Wiil dhalinyaro ah ayaa waxaa toogtay booliiska, isagoo goor dambe dhintay, kaddib markii ay isku dhacyo ka dhaceen magaalada uu mucaaradku ku xooggan yahay ee Kisumu, oo ah mid ka mid ah deegaannada afarta ah ee qalalaasuhu uu saameeyay.

Madxaweyne Uhuru Kenyatta ayaa lagu dhawaaqay inuu ku guuleystay doorashadii August, balse mar kale ayaa doorashada lagu celiyay sababo la xiriira inaysan si sax ah u dhicin.

Madxaweyne Kenyatta ayaa doonaya in mar labaad la doorto. Hoggaamiyaha mucaaradka Raila Odinga ayaa ka laabtay musharraxnimadiisii madaxtinnimada.

Gudoomiyaha guddiga doorashada Wafula Chebukati ayaa horay u sii sheegay in xorumaha coddayntu ay furmi doonaan 6:00 subaxnimo, ka dib markii ay xukuumadu damaanad qaad siisay.

Tobannaan kun oo booliis ah iyo xubnaha kale ee laamaha ammaanka ayaa loo daad gureeyay goobaha cod bixinta si ay u sugaan ammaanka goobaha laga codaynayo iyo xarrumaha codka laga dhiibanayo.

Qaar kamida Madaxda Maamul Gobolleedyada oo Maanta la filayo in ay yimaadaan Muqdisho

Muqdisho–KNN– Iyadoo lagu wado Berri oo ku beegan 28-ka Bishaan inuu Magaalada Muqdisho ka furmo Shirka u dhexeeya Madaxda Dowladda Federaalka Soomaaliya iyo kuwa Maamul Gobolleedyada Ee Xubnaha ka ah Dowladda Dhexe ayaa Maanta la filayaa in Magaalada Muqdisho ay soo gaaraan.

Warar ay heshay Idaacadda Kulmiye ayaa sheegaya in Maanta Muqdisho ay imaan doonaan Madaxweyneyaasha Koofur Galbeed iyo Galmudug oo kala ah Shariif Xasan Sheekh Aadan iyo Axmed Ducaale Geelle Xaaf.

Madaxweyneyaasha Puntland,Hirshabelle iyo Jubbaland ayaa sidoo kale la sheegay in Berri ay soo gaari doonaan Magaalada Muqdisho.

Golaha Wasiirada Soomaaliya ayaa shalay sheegay in loo diyaar garoobay Shirka Madaxda Maamul Gobolleedyada ee ka dhici doona Magaalada Muqdisho Ee Caasimadda Dalka.

Madaxweynaha Soomaaliya Maxamed C.llaahi Farmaajo ayaa Casuumaad u fidiyay Madaxda Maamul Gobolleedyada si looga wada hadlo Khilaafka u dhexeeya Dowladda Dhexe iyo Maamul Gobolleedyada.